Les mots surlignés font l'objet d'une note
1Monsieur, sen retournant le seigneur de La Pererière pardella, jey bien voulu
2laccompaigner de ce mot de lettre pour vous fère entendre la continuation
3de la santé de madamoyselle de Caseuneufve, de madame de Gordes et
4de mes petitz neveus et nièces. Bien est vray que celle de madame de
5Gordes nest pas du tout si asseuré que nous desirons bien, à cause
6de quelques nuictz quelle passe sans bien reposer. Elle a commancé ce
7jourdhuy à prandre des sirops et après prandra une medecine par
8lordonnance de maître Jehan Guilhen qui feut ces jours passez à Gargas
9pour la veoir. Notre frère, monsieur d’Evènes, est aussi après à se purger.
10Jay veu par la lettre que vous a escrite monsieur de Lessein, le voyage
11qu’a entrepris mon neveu de Laval. Je prie Dieu le nous ramener aussi
12tost en la santé que vous et tous nous souhaictons. St-Veran et
13Villevert feurent icy de retour de Choulonge au commancement de ce
14moys. Ilz apportarent pour vous douze cens dix huict escus sol et dix
15solz, lesquels madamoyselle de Caseuneufve m’a bailhés en diminution
16de ce que javoys forny pour le mariage de ma nièce d’Hourches. Et nayant
17autre chose pour vous faire ceste plus longue, je me recommanderay en
18cest endroict très humblement à votre bonne grace, en priant Dieu
19monsieur, qu’il vous doint la sienne et en parfaicte santé, longue et contante
20vie. D’Apt, ce XVIme septembre 1571. Encores ne veulx-je pas
21oblyer me recommander à mon neveu monsieur de Balthezard
22Votre bien humble et obeissant frère
23Bap[tis]te de simienne